ახალი ამბები

მედია

ახალი ამბები

ერთიანმა ნაციონალურმა მოძრაობამ გუნარ ჰოკმარკს უმასპინძლა

ერთიანი ნაციონალური მოძრაობის ცენტრალურ ოფისს დღეს ევროპარლამენტში ევროპის სახალხო პარტიის ფრაქციის ვიცე-პრეზიდენტი და ამავდროულად, ევრონესტის პოლიტიკური კომიტეტის თანათავმჯდომარე სტუმრობდა. შეხვედრის მთავარი თემა ქვეყანაში განვითარებული მოვლენები და მიმდინარე პროცესები იყო. როგორც საპარლამენტო უმცირესობის ლიდერმა დავით ბაქრაძემ აღნიშნა, აუცილებელია ქვეყნის წინსვლა გაგრძელდეს, ამასთან, მნიშვნელოვანია საქართველოს შიგნით მიმდინარე მოვლენებმა არ შეუქმნას საფრთხე ქვეყნის ევროპულ პერსპექტივას. თავის მხრივ, ევროპარლამენტში ევროპის სახალხო პარტიის ფრაქციის ვიცე-პრეზიდენტმა საქართველო-ევროკავშირს შორის ურთიერთობების განმტკიცებისა და თანამშრომლობის გაღრმავების მნიშვნელობაზე ისაუბრა, ხოლო დავით ბაქრაძემ იმედი გამოთქვა, რომ ევროპარლამენტის დეპუტატები გააკეთებენ ყველაფერს იმისთვის, რომ საქართველო იყოს წარმატებული, ევროპული ქვეყანა.შეხვედრის დასრულების შემდეგ მხარეებმა მედიისათვის ერთობლივი განცხადებებიც გააკეთეს, სადაც საპარლამენტო უმცირესობის ლიდერმა კიდევ ერთხელ ხაზგასმით აღნიშნა, ქვეყნის ევროატლანტიკური გზის უალტერნატივობა და მისი მნიშვნელობა. ”ძალიან მნიშვნელოვანია, რომ საქართველომ გააგრძელოს ევროპული განვითარება, საქართველოსა და ევროპარლამენტს შორის გაგრძელდეს ურთიერთობები ისევე მჭიდროდ და კარგად, როგორც ეს იყო მთელი ამ წლების განმავლობაში და ძალიან მნიშვნელოვანია, რომ საქართველოს შიგნით მიმდინარე მოვლენებმა არ შეუქმნას საფრთხე საქართველოს ევროპულ პერსპექტივასა და განვითარებას”, - განაცხადა დავით ბაქრაძემ.

თინათინ ბოკუჩავა იუსტიციის მინისტრის მიერ გაკეთებულ განცხადებას შემაშფოთებლად მიიჩნევს

საპარლამენტო უმცირესობის წევრმა, თინათინ ბოკუჩავამ პარტიის ცენტრალურ ოფისში ბრიფინგი გამართა, სადაც სასტუმრო „ჰოლიდეი ინში“ თეა წულუკიანის მიერ გაკეთებულ განცხადებას გამოეხმაურა. მისი შეფასებით, იუსტიციის მინისტრის დღევანდელი განცხადება, მართლაც, შემაშფოთებელია. ბოკუჩავას თქმით, ნაცვლად იმისა, რომ თეა წულუკიანმა დაგმოს სიძულვილის ენა და ძალადობის გამოყენება, როგორც პოლიტიკური ინსტრუმენტი იგი გამოდის და იზიარებს ლუკა კურტანიძის სიტყვებს. „მინდა, გამოვეხმაურო ქალბატონი თეა წულუკიანის განცხადებას, სადაც ის იზიარებს ბატონი ლუკა კურტანიძის სულისკვეთებას. საქართველოს იუსტიციის მინისტრი ნაცვლად იმისა, რომ გაემიჯნოს და დაგმოს სიძულვილის ენა და ძალადობის წახალისება იზიარებს ამას და აცხადებს, ვციტირებ – როდესაც მარტო რჩება ის ასეთი აზრები ებადება. როგორ შეიძლება, რომ ქალბატონი, რომელიც მუდმივად გვესაუბრება სამართლიანობის აღდგენაზე მოტივაციას აძლევდეს სიძულვილი, აგრესია და ძალადობა? ეს, მართლაც, შემაშფოთებელია“, – აღნიშნა თინათინ ბოკუჩავამ. ასევე მან კიდევ ერთხელ გაახმოვანა საპარლამენტო უმცირესობის მოთხოვნა ლუკა კურტანიძის თანამდებობიდან გადაყენების თაობაზე.