მედია

ახალი ამბები

გიორგი ბარამიძის სამუშაო ვიზიტი უკრაინაში დასრულდა

შედგა პარალამენტის თავმჯდომარის მოადგილის, გიორგი ბარამიძის სამუშაო ვიზიტი უკრაინაში. ქ. კიევში, სადაც მას შეხვედრები ჰქონდა უკრაინის პარლამენტის წევრებთან: პარლამენტის თავმჯდომარის პირველ მოადგილესთან იგორ კალეტნიკთან, საგარეო საქმეთა კომიტეტის თავმჯდომარის პირველ მოადგილესთან  ვალენტინ ნალივაიჩენკოსთან, ევროპასთან ინტეგრაციის კომიტეტის თავმჯდომარესთან გრიგორი ნემირიასთან, ეროვნული უსაფრთხოებისა და თავდაცვის კომიტეტის თავმჯდომარესთან, უკრაინის პარლამენტის ყოფილ თავმჯდომარესთან ვოლოდიმირ ლიტვინთან, ევროპის საბჭოს საპარლამენტო ასამბლეაში უკრაინის პარლამენტის დელეგაციის თავმჯდომარესთან ივან პოპესკუსთან, ფრაქცია “უდარის” თავმჯდომარის მოადგილესთან ვიტალი კოვალჩუკთან და ფრაქცია “ბატკივშინას” თავმჯდომარის მოადგილესთან ბორის ტარასიუკთან. გიორგი ბარამიძე ვიზიტის ფარგლებში ასევე შეხვდა უკრაინის სოციალურ საკითხთა მინისტრს ნატალია კარალევსკას. უკრაინა საქართველოსათვის აღმოსავლეთ ევროპული სტრატეგიული პარტნიორი ქვეყანაა, რომელთანაც საქმიანი, მეგობრული ურთიერთობების განმტკიცება აუცილებელია განურჩევლად იმისა თუ რომელი პარტიაა საქართველოს მთავრობაში. უკრაინის პარლამენტის ხელმძღვანელობასთან და მმართველი და ოპოზიციური პარტიების ლიდერებთან გიორგი ბარამიძის შეხვედრებისას ისაუბრეს უკრაინისა და საქართველოს ევროპულ ინტეგრაციასა და ორ ქვეყანას შორის ეკონომიკურ, სატრანსპორტო, ენერგეტიკულ, ტურიზმისა და ვაჭრობის სფეროებში ურთიერთსასარგებლო თანამშრომლობის ეფექტიანობის ამაღლების გზებზე. ხაზი გაესვა ამ ამოცანების მისაღწევად პარლამენტებისა და უმრავლესობისა და ოპოზიციის  მთავრობებთან კონსტრუქციული, საქმიანი თანამშრომლობის მნიშვნელობას. შეხვედრებზე ასევე განიხილეს უკრაინა-საქართველოს საპარლამენტო თანამშრომლობის პერსპექტივები და  საქართველოს ოკუპირებული ტერიტორიების მშვიდობიანი დეოკუპაციის, არაღიარების პოლიტიკის საერთაშორისო არენაზე გატარების და დევნილთა უსაფრთხო და ღირსეული დაბრუნების მიზნით ორ ქვეყანას შორის საერთაშორისო თანამშრომლობის გაღრმავების საკითხები. აგრეთვე, კიევის სამართლის უნივერსიტეტმა გიორგი ბარამიძეს საპატიო დოქტორის წოდება მიანიჭა.      

გიორგი თევდორაძე „ქართულ ოცნებას“ წინასაარჩევნო კამპანიაში ადმინისტრაციული რესურსის გამოყენებაში ადანაშაულებს

საპარლამენტო უმცირესობის წევრის, გიორგი თევდორაძის განცხადებით,  სამტრედიასა და ბაღდათში კოალიცია „ქართული ოცნების“ მაჟორიტარი დეპუტატობის კანდიდატები შუალედური არჩევნებისთვის კამპანიაში ადმინისტრაციულ რესურსს იყენებენ. მისი თქმით, საგაზაფხულო სამუშაოებისთვის ამ რაიონებში გაცილებით მეტი ტექნიკაა ჩაყვანილი, ვიდრე სხვაგან. ამასთან, გიორგი თევდორაძის ინფორმაციით, „ქართული ოცნების“ აქტივისტები ადგილობრივებს ეუბნებიან, რომ ტრაქტორები მათ ბიძინა ივანიშვილმა და მაჟორიტარობის კანდიდატმა გაუგზავნეს. „გვაქვს კონკრეტული ფაქტი, კერძოდ, სამტრედიის რაიონში, სოფელ იანეთში „ქართული ოცნების“ ერთ-ერთი აქტივისტი, ვაჟა კოხრეიძე მაჟორიტარი დეპუტატობის კანდიდატთან ერთად დღემდე დადის და იქაურ მცხოვრებლებს, იქაურ გლეხობას ეუბნება, რომ სწორედ მაჟორიტარი დეპუტატობის კანდიდატის დამსახურებაა მათთვის ტრაქტორების ჩაყვანა. სამართლიანად და ობიექტურად მიგვაჩნია, რომ ეს არის ადმინისტრაციული რესურსის უკანონოდ გამოყენება“, - აღნიშნა საპარლამენტო უმცირესობის წევრმა. აქვე მან დასძინა, რომ ახლა ხელისუფლება მნიშვნელოვანი გამოწვევის წინაშე დგას - რამდენად ღირსეულად გაართმევს თავს შუალედური არჩევნების დემოკრატიულ პირობებში ჩატარებას. ფრაქცია „ერთიანი ნაციონალური მოძრაობის“ წარმომადგენელი გიორგი თევდორაძე უწყებათაშორის კომისიას მიმართავს, რომ დაინტერესდნენ ზემოაღნიშნული ფაქტით.   

Pages