ახალი ამბები

მედია

ახალი ამბები

ერთიანი ნაციონალური მოძრაობის განცხადება ქ. ქუთაისის თვითმმართველობის თანამდებობის პირთა უკანონო გათავისუფლების შესახებ

5 ივლისი, 2013 წ. საქართველოს არჩეული თვითმმართველობების უმრავლესობის მსგავსად ქუთაისის თვითმმართველობის არასაარჩევნო, ძალადობრივი გზით დაუფლების შემდეგ, როგორც მოსალოდნელი იყო დაიწყო თანამშრომელთა მასიური უკანონო დათხოვნები. სამსახურიდან გათავისუფლების ერთადერთი კრიტერიუმი ქუთაისის ახალი მერის დიმიტრი კოპალიანის განცხადებითვე ერთიანი ნაციონალური მოძრაობის წევრობაა. მერის 4 ივლისის ბრძანებით, რომელიც გამოცემულ იქნა კონტროლის სამსახურის უფროსის მოადგილის მოვალების დროებითი შემსრულებლის ხათუნა ხურციძის (სატეესტაციო კომისიის წევრის ზურაბ ხურციძის შვილი) იმავე დღეს დაწერილი მოხსენებითი ბარათის საფუძველზე, თანამდებობიდან გათავისუფლდა ორი ვიცე-მერი: ამირან ძოწენიძე და კოტე რატიანი. „უკანასკნელი დღეების განმავლობაში ქალაქის ახალი ხელმძღვანელობა ახორციელებდა ზეწოლას ორივე ვიცე-მერზე, რათა მათ საკუთარი სურვილით დაეტოვებინათ თანამდებობა. ზეწოლისადმი არდამორჩილების შემთხვევაში კი იყო სისხლის სამართლებრივი დევნისა და დაპატიმრების მუქარები“, - განაცხადა ერთიანი ნაციონალური მოძრაობიდან პარლამენტის წევრმა ირმა ნადირაშვილმა. „ვიცე-მერების, რომელთაც ქუთაისის განვითარებაში და ფეხზე დაყენებაში მნიშვნელოვანი წვლილი აქვთ შეტანილი ასე გათავისუფლება არის უკანონო და ეწინააღმდეგება კანონს საჯარო სამსახურის შესახებ. მათ არ უფიქსირდებათ არცერთი გადაცდომა, არ მიუღიათ არცერთი გაფრთხილება და მათ მიმართ არ წარმოებს არანაირი ოფიციალური დევნა“, - დასძინა მან. მიმდინარე რეორგანიზაციის და ბიუროკრატიული აპარატის ზოგადი ზრდის შედეგად, ქ. ქუთაისის მერიიდან დათხოვნილია 87 ადამიანი. „ეს ყველაფერი ხდება ნეპოტიზმის არნახული აყვავების ფონზე, რამაც ფაქტობრივად, წალეკა სახელმწიფო აპარატი. მაგალითად, აპრილის მონაცემებით, 50 მუნიციპალიტეტიდან დათხოვნილი 2,000 ადამიანის სანაცვლოდ სამსახურში აყვანისას მხოლოდ ერთ მუნიციპალიტეტში ჩატარდა კონკურსი. იმ დროს, როცა ეკონომიკა განიცდის შენელებას და ხალხი ყოველდღიურად კარგავს სამსახურს, ბიუროკრატიის ზრდა ეკონომიკას კიდევ უფრო შეანელებს. ეს ეკონომიკის ზოგადი კანონია“, - განაცხადა ნადირაშვილმა.

ერთიანი ნაციონალური მოძრაობის განცხადება ეუთოს საპალამენტო ასამბლეის რეზოლუციის შესახებ

03.07.2013 დღეს, 3 ივლისს ქ. სტამბოლში მიმდინარე ეუთოს საპარლამენტო ასამბლეის პლენარულმა სესიამ ერთხმად დაამტკიცა შვედი დეპუტატის კრისტიან ჰოლმის მიერ შეთავაზებული შესწორება რეზოლუციაში „ჰელსინკი 40+“ საქართველოში შერჩევითი სამართლის გამოყენებისა და ერთიანი ნაციონალური მოძრაობის გენერალური მდივნის ივანე მერაბიშვილის წინასწარ პატიმრობაში აყვანის გამო შეშფოთების შესახებ. აღსანიშნავია, რომ შესწორება რეზოლუციის სწორედ იმ ნაწილში შევიდა, სადაც საუბარია პოლიტიკური პატიმრების არსებობის დაუშვებლობის, პოლიტიკურ ოპონენტებთან ანგარიშსწორებისა და შერჩევითი სამართლის მიუღებლობის შესახებ (მუხლი 108). რეზოლუციის 152-ე პარაგრაფი გვამცნობს: „იხსენებს რა მონაკოში 2012 წელს მიღებულ რეზოლუციას „საქართველოში სიტუაციის შესახებ“ და მიესალმება რა ისტორიაში პირველ ხელისუფლების გადაცემას არჩევნების გზით, ასამბლეა ხაზს უსვამს კანონის უზენაესობის მნიშვნერლობას და მოუწოდებს საქართველოს მთავრობას თავი შეიკავოს შერჩევითი სამართლის გამოყენებისგან და გამოხატავს შეშფოთებას ყოფილი პრემიერ–მინისტრის და სავარაუდო საპრეზიდენტო კანდიდატის წინასწარი პატიმრობის თაობაზე“. მნიშვნელოვანია, რომ შესწორების წინააღმდეგ პლენარულ სხდომაზე არავინ წასულა, მათ შორის, არც საქართველოს დელეგაციის წევრი საპარლამენტო უმრავლესობის წარმომადგენლები. არანაკლებ მნიშვნელოვანია ის, რომ შესწორებას მხარი დაუჭირა ამერიკის შეერთებული შტატების დელეგაციამ, რომელიც ასამბლეაზე წარმოდგენილია როგორც კონგრესმენებით, ასევე სენატორებით. „ერთიანი ნაციონალური მოძრაობა მიიჩნევს, რომ მიღებული რეზსოლუცია კიდევ ერთხელ ადასტურებს საერთაშორისო თანამეგობრობის სულ უფრო მკაფიოდ გამოხატულ აზრს იმასთან დაკავშირებით, რომ შერჩევითი სამართლის საქართველოს მთავრობის მიერ ყოველდღიური ცხოვრების წესად დამვიდრება ზიანს აყენებს საქართველოს“, – განაცხადა პარლამენტის წევრმა გიორგი კანდელაკმა. „იმ ფონზე, როცა ყოველდღე ყველა ოფიციალური მონაცემით იზრდება უმუშევრობა და მოქალაქეები რჩებიან შემოსავლის გარეშე, იმ ქვეყნის იმიჯის დამკვიდრება, სადაც იდევნება ოპოზიცია აფრთხობს ინვესტორებს და კიდევ უფრო ამძიმებს ისედაც მძიმე ეკონომიკურ სურათს“, – დასძინა მან.