მედია

ახალი ამბები

ნიკა მელიას სიტყვა აშშ-ის ვიცე-პრეზიდენტ მაიკ პენსსთან გამართულ შეხვედრაზე

ნაციონალური მოძრაობის ლიდერი ნიკა მელია, სხვა ოპოზიციური პარტიების წარმომადგენლებთან ერთად, ამერიკის შეერთებული შტატების ვიცე-პრეზიდენტს მაიკ პენსს შეხვდა. "მსურს, გულწრფელი მადლობა გადაგიხადოთ თქვენი საქართველოში სტუმრობისთვის. ეს ვიზიტი კიდევ ერთხელ არწმუნებს და იმედით აღავსებს საქართველოს პატრიოტებს და მათ, ვისაც სჯერა, რომ ჩვენი მომავალი აშშ-თან სტრატეგიულ მოკავშირეობაში, ნატოს სრულფასოვან წევრობაში, ჩვენი დემოკრატიის კონსოლიდაციაში, თავისუფალი ბაზრის განვითარებასა და კრიტიკული სამოქალაქო საზოგადოების არსებობაშია. ამერიკის შეერთებული შტატები ჩვენთვის წარმოადგენს მაგალითს. ჩვენ თქვენგან ვსწავლობთ თუ რა მიღწევები მოაქვს ხალხისთვის დემოკრატიას. არც ერთი ქართველი და, მითუმეტეს, ჩემი პარტიის წევრი, არ დაივიწყებს იმ განუზომელ პოლიტიკურ და ფინანსურ რესურსს, რაც ბოლო 25 წლის განმავლობაში აშშ-ს აქვს გაღებული საქართველოს დამოუკიდებლობის, სუვერენიტეტისა და ტერიტორიული მთლიანობის დაცვის საქმეში. ამიტომ, უპირველეს ყოვლისა, მსურს, ვისაუბრო იმ საფრთხეზე, რომელიც ჩვენს დემოკრატიას ემუქრება. სამწუხაროდ, საქართველოს ამჟამინდელმა ხელისუფლებამ ხელიდან გაუშვა შანსი, ქვეყნის სასარგებლოდ გამოეყენებინა 2012 წელს ჩემი პარტიის - ერთიანი ნაციონალური მოძრაობის მიერ დამკვიდრებული ხელისუფლების მშვიდობიანი, არჩევნების გზით გადაბარების  პრეცედენტი. საარჩევნო დაპირებების შესრულებისა და საქართველოს მოქალაქეების ცხოვრების გაუმჯობესების ნაცვლად, რომელთა უმრავლესობა სიღარიბეში ცხოვრობს, ეს ხელისუფლება ახორციელებს პროდასავლური ოპოზიციისა და მედიის დევნას, სასამართლოს პოლიტიკური მიზნებით გამოყენებას და ერთპარტიულად ცვლის კონსტიტუციას საკუთარი ძალაუფლების გახანგრძლივების მიზნით. ბატონო ვიცე პრეზიდენტო, მეტად მნიშვნელოვანია იმის გააზრება, რომ ეს ხელისუფლება იმართება ერთი ადამიანის მიერ და ანგარიშვალდებულია ასევე მხოლოდ ერთი ადამიანის წინაშე, რომელსაც არ უკავია არავითარი ოფიციალური თანამდებობა. ეს არის ბიძინა ივანიშვილი, რომელმაც თავისი ქონება დააგროვა 1990-იანი წლების რუსეთში და არის გაზპრომის აქციონერი. თავის მხრივ, ივანიშვილი, რომელიც დე-ფაქტო მართავს ქვეყანას, არ არის ანგარიშვალდებული არავის მიმართ. შესაბამისად, 2012 წლის თავისუფალი და სამართლიანი არჩევნების შედეგად პირველად ხელისუფლების დემოკრატიული გზით გადაცემის შემდეგ მნიშვნელოვანი წინგადადგმული ნაბიჯების ნაცვლად, საქართველო იქცა კიდევ ერთ ოლიგარქიულ პოლიტიკურ სისტემად პოსტ-საბჭოთა სივრცეში. ჩემი პარტია, რომელიც ხელისუფლებაში იყო 9 წლის განმავლობაში და რომელმაც საფუძველი ჩაუყარა დემოკრატიულ ინსტიტუტებს, მიზნად ისახავდა საქართველოს ევრო-ატლანტიკური ინტეგრაციის შეუქცევადობას. ჩვენ ამ გზას ვაგრძელებთ ოპოზიციაშიც და წარმოვადგენთ ამ მთავრობის ყველაზე ძლიერ ალტერნატივას. სწორედ ამიტომ, ჩვენ ვართ მიზანმიმართული პოლიტიკურად მოტივირებული დევნის ობიექტი ხელისუფლების მხრიდან. საქართველოს ყოფილი პრეზიდენტი, მიხეილ სააკაშვილი, რომელსაც, როგორც მოგეხსენებათ, ახლახანს ჩამოართვეს უკრაინის მოქალაქეობა, 2013 წელს გაძევებულ იქნა საქართველოდან და ქართული პოლიტიკური სივრციდან პოლიტიკურად მოტივირებული ბრალდებების საფუძველზე. როგორც ჩანს, პოლიტიკური ოპონენტების წინააღმდეგ მართლმსაჯულების სისტემის გამოყენება პოსტ-საბჭოთა ქვეყნებში ოლიგარქების ხელწერას წარმოადგენს. ჩვენი სხვა ლიდერები კვლავაც რჩებიან პატიმრობაში.მიუხედავად პროდასავლური რიტორიკისა, ეს ხელისუფლება რისკის ქვეშ აყენებს საქართველოს ევრო-ატლანტიკურ ინტეგრაციას არა მარტო პროდასავლური ოპოზიციისა და მედიის დევნით, არამედ პრორუსული ძალების გაძლიერებით, პრორუსული პროპაგანდის ხელშეწყობითა და დაფინანსებით, რამაც შესაძლოა ხელი შეუწყოს  საზოგადოების პრორუსული განწყობის გაძლიერებას და პუტინის რეჟიმთან დამაზიანებელ გარიგებებს, რომლის მაგალითად გვაქვს საქართველოს მთავრობის მიერ გაზპრომთან ფარულად დადებული ქვეყნისთვის დამაზიანებელი ხელშეკრულება. ამის შედეგად, ბოლო 4 წლის განმავლობაში საზოგადოების მხარდაჭერა ნატოში გაწევრიანების მიმართ 15%-ით შემცირდა. სწორედ ამიტომ, თქვენი ვიზიტი და სხვა მკაფიო სიგნალები აშშ-ის მტკიცე მხარდაჭერისა საქართველოს დემოკრატიისა და ევრო-ატლანტიკური მომავლისადმი დღეს განსაკუთრებით მნიშვნელოვანია.საქართველოს ევრო-ატლანტიკური კურსის შეუქცევადობა ჩვენი საერთო ინტერესია, რადგან საქართველოს წარმატება მნიშვნელოვანი პოზიტიური ფაქტორი იქნება მთელი რეგიონისთვის. ეს რეალობა კარგად ესმის პუტინს და სწორედ ამიტომ ეწინააღმდეგება დემოკრატიულ ტრანსფორმაციას მის სამეზობლოში, რასაც მისი ავტორიტარული რეჟიმის მთავარ საფრთხედ აღიქვამს.ჩვენ დღეს ვიმყოფებით თბილისის ცენტრში, საიდანაც ერთი საათის სავალზე  დგანან რუსული ტანკები, რაც არამდგრადი ხელისუფლების პირობებში მნიშვნელოვანი შემაფერხებელი ფაქტორია ქვეყნის ეკონომიკური განვითარებისა და სიღარიბის დაძლევის თვალსაზრისით. თავის მხრივ, სოციალური დაუცველობა და უპერსპექტივობის განცდა იწვევს იმედგაცრუებას ჩვენს მიერ გაცხადებულ მიზნებში და ხელს აძლევს რუსეთს, რომელიც პროპაგანდის უამრავი საშუალებით ცდილობს დაარწმუნოს ქართული საზოგადოება, რომ დასავლეთმა დაკარგა ჩვენს მიმართ ინტერესი.  რუსეთი დღემდე არ ასრულებს 2008 წლის ცეცხლის შეწყვეტის ხელშეკრულებას და განაგრძობს საქართველოს ოკუპირებული ტერიტორიების ანექსიას. ჩვენ ვიმედოვნებთ, რომ ეს საკითხები კვლავაც მნიშვნელოვან ადგილს დაიკავებს აშშ-რუსეთს შორის ურთიერთობების დღის წესრიგში.მე, როგორც ყველაზე დიდი პროდასავლური ოპოზიციური პარტიის ლიდერს, მსურს დაგარწმუნოთ, რომ გავაკეთებთ ყველაფერს რაც ჩვენს შესაძლებლობებშია, რათა ამ ოლიგარქიულ ხელისუფლებას არ მივცეთ საქართველოს სტრატეგიული ევროატლანტიკური გზიდან გადახვევის საშუალება. ასევე, ვიმედოვნებთ, რომ თქვენ გაუგზავნით საქართველოს დემოკრატიული მომავლის მხარდაჭერის  მკაფიო გზავნილს და დაარწმუნებთ მათ, გამოიყენონ კონსტიტუციური პროცესი ქვეყნის დემოკრატიული განვითარებისთვის, შეწყვიტონ დამოუკიდებელი მედიისა და პროდასავლური ოპოზიციური პარტიების დევნა, პოლიტიკური ოპონენტების დაპატიმრება ან ქვეყნიდან განდევნა, როგორც პრეზიდენტ მიხელ სააკაშვილის შემთხვევაში - ადამიანის, რომლის ლიდერობითაც გატარებული რეფორმების შედეგად შეიქმნა თანამედროვე ქართული სახელმწიფო. ამერიკელი ხალხი ყოველთვის იყო საქართველოს მთავარი პარტნიორი თანამედროვე დემოკრატიული სახელმწიფოს მშენებლობის საქმეში და დარწმუნებული ვართ ასე იქნება თქვენი ადმინისტრაციის პირობებშიც. კიდევ ერთხელ გიხდით მადლობას საქართველოში სტუმრობისთვის." 

ენმ მოითხოვს დაუყოვნებლივ შეწყდეს პოლიტიკური დევნა მიხეილ სააკაშვილის წინააღმდეგ

ერთიანი ნაციონალური მოძრაობის ლიდერის ზაზა ბიბილაშვილის განცხადებით ენმ მოითხოვს დაუყოვნებლივ შეწყდეს პოლიტიკური დევნა მიხეილ სააკაშვილისა და პროდასავლური ოპოზიციის წინააღმდეგ.გუშინ ცნობილი გახდა, რომ პეტრო პოროშენკომ უკრაინის მოქალაქეობა ჩამოართვა მიხეილ სააკაშვილს. უკვე არავის ეპარება ეჭვი, რომ სახეზეა ორ ოლიგარქს შორის გარიგება, რომლის მიზნები სრულ თანხვედრაშია ქართველი და უკრაინელი ხალხების საერთო მტრის, რუსეთის მიზნებთან. იმედი გვქონდა, რომ ხუთი წლის თავზე მაინც, ივანიშვილის რეჟიმი შეძლებდა გადაებიჯებინა ვიწროპარტიული ბოღმისთვის და სახელმწიფოებრივად მიდგომოდა მეგობარ უკრაინასთან ურთიერთობას. მაგრამ აშკარაა, რომ სწორედ მიხეილ სააკაშვილის პოლიტიკური დევნის საკითხი იყო მოლაპარაკების მთავარი თემა ივანიშვილსა და პოროშენკოს შორის. ასევე, ივანიშვილის რეჟიმი, ახლა უკვე უკრაინელ ოლიგარქთან ერთად, აგრძელებს პუტინის დავალებების შესრულებას ან, როგორც მინიმუმ, პუტინის მიზნებთან სინქრონში თამაშს. ამით, ორ ოლიგარქს სურს პოლიტიკურ ბრძოლას ჩამოაშოროს რეგიონში ანტიპუტინური ფრონტის მთავარი ფიგურა, პოსტსაბჭოთა სივრცეში გატარებული წარმატებული რეფორმების ერთადერთი მაგალითი და სიმბოლო. ამ გარიგებით, ოლიგარქებს სურთ რეგიონში თავისუფლების ფრონტის დასუსტება და ანტიდასავლური ძალების გაძლიერება, რომლებიც აფერხებენ ქართველი და უკრაინელი ხალხების ბრძოლას თავისუფლებისთვის. 3 თვეში საქართველოში ადგილობრივი არჩევნებია. ჩვენ ვსაუბრობთ ხალხის ნების მოსალოდნელ გაყალბებაზე, ხელისუფლების მიერ ორგანიზებულ ძალადობაზე, ლეგალიზებულ მოსყიდვაზე, ივანიშვილის შავ ფულზე, ქურდული სამყაროსა და ადმინისტრაციული რესურსის გამოყენებაზე.მაგრამ როგორ შეიძლება სამართლიანი და დემოკრატიული ეწოდოს საარჩევნო გარემოს, როცა მთავარი ოპოზიციური პარტიის ლიდერი, საქართველოს მესამე პრეზიდენტი პოლიტიკურ დევნილობაშია, როცა ჩვენი სხვა ლიდერები ციხეში ან ასევე იძულებით დევნილობაში იმყოფებიან და როცა ენმ-ის პოლიტსაბჭოს თავმჯდომარეზე სისხლის სამართლის საქმეა აღძრული? უადგილოა არჩევნების ტექნიკურ ხარვეზებზე საუბარი, როცა მეხუთე წელია, ირღვევა დემოკრატიის ფუნდამენტური პრინციპები და ორგანიზებულად იდევნება პროდასავლური დემოკრატიული ოპოზიცია. შევახსენებთ საზოგადოებას, რომ სააკაშვილის წინააღმდეგ მიმდინარე ოთხივე საქმიდან განაჩენი არც ერთზე არ დამდგარა. ნებისმიერი კეთილსინდისიერი დამკვირვებლისთვის ცხადია, რომ ოთხივე საქმე თავისი შინაარსით სამარცხვინოა და ამჟღავნებს ივანიშვილის რეჟიმის რეალურ მისწრაფებებს, რასაც საერთო არაფერი აქვს ქართველი ერის მიზნებთან. ყოველივე ზემოაღნიშულიდან გამომდინარე, მოვითხოვთ, დაუყოვნებლივ შეწყდეს პოლიტიკური დევნა მიხეილ სააკაშვილის და პროდასავლური ოპოზიციის წინააღმდეგ. მიხეილ სააკაშვილისა და პროდასავლური დემოკრატიული ოპოზიციის პოლიტიკური მომავალი უნდა გადაწყვიტოს ქართველმა ამომრჩეველმა და არა ივანიშვილის ჯიბის პროკურატურამ და ოლიგარქების კულუარულმა გარიგებამ. ერთიანი ნაციონალური მოძრაობა ბოლომდე იბრძოლებს საქართველოში პუტინისადმი ლოიალურად განწყობილი, ივანიშვილის ოჯახურ-კლანური რეჟიმის დასასრულებლად. 

Pages