მედია

ახალი ამბები

რეპრესიებმა და საზოგადოების ტერორის პრაქტიკამ ყოველდღიური ხასიათი მიიღო

ერთიანი ნაციონალური მოძრაობა მოითხოვს, დაუყოვნებლივ გათავისუფლდნენ დაპატიმრებული მომღერლები და დადგეს ყველა იმ პირის  პოლიტიკური და სამართლებრივი პასუხისმგებლობა, რომლებიც უშუალოდ მონაწილეობდნენ ამ საქმეში. მათ შორის, ძალოვანი უწყებების ხელმძღანელებმა დატოვონ თანამდებობები.  აღნიშნულის შესახებ დღეს გამართულ ბრიფინგზე კოტე იოსელიანმა ისაუბრა.  „ნარკოტიკების ჩადებით მომღერლების დაპატიმრება კიდევ ერთი დასტურია იმისა, რომ ქართული ოცნების ხელისუფლების მხრიდან რეპრესიებმა და საზოგადოების ტერორის პრაქტიკამ ყოველდღიური ხასიათი მიიღო. ნარკოტიკების და იარაღის ჩადება, უკანონო თვალთვალი და შანტაჟი არის ის ბინძური მეთოდები, რასაც ქართული ოცნება იყენებს კრიტიკულად განწყობილი ჟურნალისტების და საზოგადოების აქტიური ნაწილის წინააღმდეგ. ქართული ოცნება დგას ნეპოტიზმზე, კორუფციაზე, მაფიოზურ კლანებზე და იმ პარტიულ პოლიციაზე, რასაც სუს-ის სახელით ვიცნობთ. ივანიშვილის ხელისუფლება საქართველოს მოქალაქეებს დასცინის. ერთის მხრივ, სრულიად უსაფუძვლოდ და უსამართლოდ, ნარკოტიკების ან იარაღის ჩადებით, ქართული ოცნება ადამიანებს ძალიან დიდი ხნით ისტუმრებს პატიმრობაში. მეორეს მხრივ, პროკურატურა საქმეებზე პოზიციონირებას ახდენს ამ მაფიოზურ კლანში წარჩინებული პირების მითითებების ან ბერა ივანიშვილის ფეისბუქ პოსტის მიხედვით. კალაძეს კი, რომელიც გუშინ  ნარკოტიკების ჩადებით დაპატიმრებული მომღერლების საკითხს მორალის კითხვის ვიდეო ლექციით გამოეხმაურა, ფეხბურთის ფედერაციის პრეზიდენტის სკანდალური არჩევნები უკავშირდება, როცა ხმის უფლების მქონე ადამიანს ნარკოტიკული საშუალება ჩაუდეს და დააპატიმრეს,  რათა კენჭისყრის შედეგზე გავლენა მოეხდინათ.“   

ვმო-ს ფარგლებში არსებულ ხელშეკრულებაში შესაძლო ცვლილება ტერიტორიული მთლიანობის აღდგენის საწინააღმდეგოდ გადადგმული ნაბიჯი იქნება

ერთიანი ნაციონალური მოძრაობა ხელისუფლებას მოუწოდებს  ვაჭრობის მსოფლიო ორგანიზაციის (ვმო) ფარგლებში გაფორმებულ ხელშეკრულებაში ცვლილებები არ შევიდეს და  ოკუპირებული რეგიონებისთვის სატრანზიტო სტატიუსის მინიჭება არ მოხდეს, რადგან ეს  საქართველოს ტერიტორიული მთლიანობის აღდგენის საწინააღმდეგოდ გადადგმული ნაბიჯი იქნება.აღნიშნულის შესახებ დღეს გამართულ ბრიფინგზე კოტე იოსელიანმა ისაუბრა. „ვაჭრობის მსოფლიო ორგანიზაციის ფარგლებში, რუსეთსა და საქართველოს შორის შეთანხმების გაფორმება მიზნად ისახავდა ამ ორგანიზაციაში გასაწევრიანებლად რუსეთისთვის დაბრკოლების მოხსნას. ამის სანაცვლოდ, ჩვენ შევძლებდით ოკუპირებულ ტერიტორიებსა და რუსეთს შორის მიმდინარე სავაჭრო ურთიერთობების კონტროლს. ეფექტური დიპლომატიური ძალისხმევების შედეგად, ჩვენი მოთხოვნა დაკმაყოფილდა და სავაჭრო კორიდორების პრინციპი, საქართველოს ინსტერესების სრული გათვალისწინებით ჩაიდო ხელშეკრულებაში. ვინაიდან რუსეთი უკვე არის ვაჭრობის მსოფლიო ორგანიზაციის წევრი, ხელშეკრულებაში რაიმე სახის ცვლიელების შეტანა მნიშვნელოვნად დააზიანებს ჩვენი ქვეყნის ინტერესებს. ამ საკითხზე რუსეთის ფედერაციის საგარეო საქმეთა სამინისტროს ბოლო განცხადება ცალსახად პროვოკაციულია. ქართული ოცნების წარმომადგენებს უნდა ესმოდეთ, რომ მსგავსი ნაბიჯებით, რუსეთი ცდილობს საოკუპაციო რეჟიმებისთვის და საკუთარი სამხედრო ბაზებისთვის ეკონომიკური ფუნციის მინიჭბას. აქედან გამომდინარე, ჩვენი მხრიდან ნებისმიერი კომპრომისი რუსეთის ინტერესების რეალიზების ხელშეწყობასა  და ჩვენი ქვეყნისთვის გამოუსწრებელი შედეგების დადგომას მოახდენს.  კიდევ ერთხელ ვიმეორებ, ოკუპირებული რეგიონრებისთვის სატრანზიტო სტატიუსის მინიჭება  საქართველოს ტერიტორიული მთლიანობის აღდგენის საწინააღმდეგოდ გადადგმული ნაბიჯია.მოვუწოდებთ ხელისუფლებას, იურიდიული ძალის მქონდე დოკუმენტით შეუზღუდოს ზურაბ აბაშიძეს, აბაშიძე-კარასინის ფორმატში, როგორც აფხაზეთის რკინიგზის მონაკვეთის საკითხის, ასევე ვაჭრობის მსოფლიო ორგანიზაციის გარგლებში გაფორმებული ხელშეკრულებით გათვალისწინებული სავაჭრო დერეფნების სტატუსის განხილვის უფლება. ასევე, მოვუწოდებთ ქართული ოცნების ხელისუფლებას, რომ ნებისმიერი სადავო საკითხი განიხილოს მხოლოდ ხელშეკრულებით გათვალისწინებული ვაჭრობის მსოფლიო ორგანიზაციის დავების მოგვარების მექანიზმის გამოყენებით. ეს არის საარბიტრაჟო ტრიბულანის სისტემა, რომელიც არის საბოლოო და შესასრულებლად სავალდებულო.“

Pages