ენმ "გაზპრომთან" მოლაპრაკებების შეჩერებას ითხოვს

ერთიანი ნაციონალური მოძრაობა „გაზპრომთან“ მოლაპრაკებების შეჩერას ითხოვს. აღნიშნულის შესახებ დღეს გამართულ ბრიფინგზე პარტიის ერთ-ერთმა ლიდერმა რომან გოცირიძემ განაცხადა. მან ასევე საზოგადოებას ის რეზოლუცია გააცნო, რომელიც ენმ-მ შეიმუშავა. „ეს არის ქვეყნის ეროვნული ინტერესების საწინააღმდეგო ქმედება და ფაქტობრივად, საქართველოს ხელისუფლებამ რუსეთის წინაშე კაპიტულაცია მოახდინა. იმ შემთხვევაშიც კი, როდესაც ჩვენ გვაქვს სერიოზული ბერკეტები, სადაც გვაქვს უპირატესობა, როდესაც ასეთ დათმობაზე მიდიხარ, წარმოგვიდგენია რა მოხდება უფრო მძიმე მოლაპარაკების შემთხვევაში. პოლიტიკურად ეს ხელშეკრულება დამაზარალებელია ქვეყნის ეროვნული ინტერესებისთვის, ხოლო ეკონომიკურად წამგებიანი, ჩვენ წელიწადში ვკარგავთ დაახლოებით 20 მილიონ დოლარს. მთავრობის წარმომადგენლების განცხადებებითაც ჩანს, რომ იმ ფულით რასაც „გაზპრომი“ საქართველოს ტრანზიტის სანაცვლოდ მისცემს, ვერ ვიყიდით იმის ნახევარ გაზსაც, რასაც ბოლო 15 წლის განმავლობაში ვიტოვებდით. იმ ხარჯების გათვალისწინებით, რასაც საქართველო ეწევა მილის საექსპლუატაციო მომსახურების სახით, ფაქტობრივად გამოდის, რომ რუსეთისა და სომხეთისთვის ვმუშაობთ. რეალური ეკონომიკური ეფექტი მხოლოდ სიმბოლური იქნება. გვაქვს ეჭვი, რომ ეს არის პოლიტიკური კაპიტულაციის, ან არაკომპეტენტურობის ან ვიღაცების პირადი დაინტერესების ანუ კორუფციის შედეგი. ამ რეზოლუციით ჩვენ მოვითხოვთ, რომ მთელი მთავრობის პასუხისმგებლობის საკითხი დადგეს, შეჩერდეს მოლაპარაკების პროცესი და თუ ხელმოწერილია ხელშეკრულება, საქართველოს ხელისუფლებამ დაიწყოს გაუქმებაზე მუშაობა“, - განაცხადა რომან გოცირიძემ.

საქართველოს პარლამენტის რეზოლუცია საქართველოს მთავრობასა და კომპანია „გაზპრომს“ შორის მიმდინარე მოლაპარაკებების შესახებ

საქართველოს ხელისუფლება აწარმოებს მოლაპარაკებებს ბუნებრივი აირის მწარმოებელ უმსხვილეს რუსულ კომპანია „გაზპრომთან“ რუსეთიდან სომხეთში ბუნებრივი აირის ტრანზიტის პირობების შეცვლის თაობაზე, რაც გულისხმობს 2018 წლიდან ტრანზიტის საფასურის - ტრანზიტული გაზის 10%-ის ნატურით მიღების ფულადი ანაზღაურებით ჩანაცვლებას. ზემოაღნიშნულიდან გამომდინარე, საქართველოს პარლამენტი: ა. ითვალისწინებს რა საქართველოს წარსულ გამოცდილებასა და რუსეთის ფედერაციის ხელისუფლების მიერ პოლიტიკურ ინსტრუმენტად ქცეულ ენერგოკომპანიებზე დამოკიდებულების უარყოფით შედეგებს - რეგულარულ დივერსიულ აქტებს მაგისტრალურ გაზსადენებზე, მათ შორის 2006 წლის იანვარში; რუსეთის ხელისუფლების მიერ ე.წ. ენერგო ომის პოლიტიკური მიზნებისთვის წარმოების პრაქტიკას აღმოსავლეთ ევროპის ზოგიერთ სახელმწიფოსთან - უკრაინა (1992-1994 წწ., 2005-2006 წწ., 2008-2009 წწ., 2013-2015 წწ.), ბელარუსი (2004 წ., 2007 წ.), მოლდოვა (2012 წ.); ბ. აღნიშნავს რა, რომ რუსეთის ფედერაციას დღემდე უკანონოდ აქვს ოკუპირებული საქართველოს ტერიტორიები, მუდმივად ახორციელებს პროვოკაციულ ქმედებებს - საქართველოს მოქალაქეების გატაცება, საოკუპაციო ხაზის გადმოწევა და სხვ.; მუდმივად და ყველა მეთოდით, განსაკუთრებით, ენერგორესურსებზე დამოკიდებულებისა და შანტაჟის გზით, ცდილობს საქართველოსა და რეგიონის სხვა სახელმწიფოების ევროპული და ევროატლანტიკური ინტეგრაციის პროცესის შეფერხებას; გ. ხაზს უსვამს რა უშუალოდ „გაზპრომის“ როლს რუსეთის ხელისუფლების მიერ არა მხოლოდ რეგიონის, არამედ ასევე ევროკავშირის წევრი სახელმწიფოების, როგორც საგარეო კურსის, ისე შიდა პოლიტიკური პროცესების მართვის მცდელობაში; დ. აღნიშნავს რა, რომ აღნიშნული მოლაპარაკებები საქართველოს მთავრობასა და „გაზპრომს“ შორის მიმდინარეობს გასაიდუმლოებულ ფორმატში საჯარო განხილვისა და ფართო პოლიტიკურ სპექტრსა თუ სამოქალაქო სექტორთან კონსულტაციების გარეშე; ე. ხაზს უსვამს რა, რომ აღნიშნული მოლაპარაკებების ფარგლებში განსაზღვრული პირობების შედეგად, შესაძლოა მნიშვნელოვნად შემცირდეს საქართველოს ტერიტორიაზე „გაზპრომის“ მიერ განხორციელებული გაზის ტრანზიტიდან საქართველოს სახელმწიფოს მიერ მიღებული შემოსავალი; ადგენს: 1. აღნიშნული შეთანხმება საფრთხეს უქმნის საქართველოს ენერგოსისტემის სტაბილურობასა და უსაფრთხოებას, რაც სრულიად ეწინააღმდეგება ქვეყნის ეროვნული უსაფრთხოების პოლიტიკასა და ინტერესებს; 2. აღნიშნული შეთანხმება ეწინააღმდეგება ქართველი ხალხის მიერ მრავალგზის გაცხადებულ ნებას და საფრთხეს უქმნის ქვეყნის ევროპული და ევროატლანტიკური ინტეგრაციის პროცესს; 3. დაუშვებელია სახელმწიფო ინტერესების საზიანო, მაღალი პოლიტიკური, ეკონომიკური და ფინანსური რისკების შემცველი შეთანხმების გაფორმება ისეთ არასანდო პარტნიორთან, როგორიც არის ოკუპანტი სახელმწიფოს ხელისუფლების მიერ მართული კომპანია „გაზპრომი“; 4. დაუყოვნებლივ გასაჯაროვდეს აღნიშნული მოლაპარაკებების შინაარსი; 5. დადგეს საქართველოს მთავრობის პასუხისმგებლობის საკითხი.

ენმ-ის რიგით მე-7 ყრილობა 20 იანვარს, 14:00 საათზე სპორტის სასახლეში გაიმართება

ერთიანი ნაციონალური მოძრაობის რიგით მე-7 ყრილობა 20 იანვარს, 14:00 საათზე სპორტის სასახლეში გაიმართება და მასზე უკვე რეგისტრირებულია 7136 დელეგატი. პარტიის იმ წევრებისთვის, რომელთაც სურვილი აქვთ ყრილობას დაესწრონ, დამზადდა დამატებითი მოსაწვევები, რომელთა მიღებაც შესაძლებელია ”ნაციონალური მოძრაობის” ცენტრალურ ოფისში, კახეთის გზატკეცილზე და სააკაშვილის საპრეზიდენტო ბიბლიოთეკაში. ყრილობას მთლიანობაში 9 000 ადამიანი დაესწრება. როგორც ნაციონალური მოძრაობის წევრმა ნინო კალანდაძემ დღეს გამართულ საინფორმაციო ბრიფინგზე განაცხადა, ყრილობის ძირითადი ნაწილი პოლიტიკური ლიდერების გამოსვლას დაეთმობა, არჩეული იქნება პოლიტსაბჭოს ახალი შემადგენლობა, პოლიტსაბჭოს ახალი თავმჯდომარე. ”მთავარი აქცენტები გაკეთდება თუ რა გეგმები ექნება პარტიას და როგორ აპირებს ის ივანიშვილის ოლიგარქიული ხელისუფლების წინააღმდეგ ბრძოლას. რაც შეეხება პარტიის თავმჯდომარის საკითხს, თავმჯდომარის არჩევა არ მოხდება მანამ, სანამ პოლიტიკური რეპრესიები არ დასრულდება და ამ საკითხთან დაკავშირებით ყრილობა დეკლარაციის მიღებას გეგმავს”, - განაცხადა ნინო კალანდაძემ.

მთავრობამ „სოფლის მხარდაჭერის პროგრამა" გააუქმა

საქრთველოს მთავრობის მიერ მიღებულ საზიანო გადაწყვეტილებაზე, რომელიც რეგიონებს შეეხება და „სოფლის მხარდაჭერის პროგრამის“ გაუქმებას გულისხმობს, დღეს გამართულ ბრიფინგზე ერთიანი ნაციონალური მოძრაობის წარმომადგენელმა გიორგი ბოტკოველმა ისაუბრა. ”მთავრობამ მიიღო გადაწყვეტილება გააუქმოს სოფლის მხარდაჭერის პროგრამა, რომელიც ითავალისწინებდა შემდეგს - ყველა სოფელს თვითონ მიეღო გადაწყვეტილება რა პროექტი უნდა განეხორციელებინა. პროექტი მოქმედებდა 2009 წლიდან და 2012 წლამდე იყო მზარდი, მაგრამ ხელისუფლებამ იმის ნაცვლად, რომ გაეზარდა მისი დაფინანსება, ეს პროექტი შეწყვიტა. სოფლის მოსახლეობას ჰქონდა გამოყოფილი კონკრეტული თანხა და სოფლის კრება თავად იღებდა გადაწყვეტილებას რა განეხორციელებინა თავის სოფელში. მთავრობამ ეს გადაწყვეტილება იმის გამო მიიღო, რომ ხელისუფლების წარმომადგენლები „უფრო აქტიურად ჩაერთონ იმ კორუფციულ სქემებში, რომლებიც მოქმედებს ამა თუ იმ რეგიონული პროექტის განხორციელებაში“ - განაცხადა ბოტკოველმა.

ენმ-დან წასული ჯგუფი პარლამენტის ფრაქცია ნაციონალური მოძრაობის დატოვებაზე უარს ამბობს

ერთიანი ნაციონალური მოძრაობიდან წასული ის მცირე ჯგუფი, რომელმაც პარტიის დატოვების შესახებ განცხადება 12 იანვარს გააკეთეს, პარლამენტში ენმ-ის ფრაქციის დატოვებაზე უარს აცხადებენ. აღნიშნულის შესახებ დღეს გამართულ ბრიფინგზე თინა ბოკუჩავამ ისაუბრა. „12 იანვარს გიგა ბოკერიას გუნდმა ერთიანი ნაციონალური მოძრაობის დატოვების თაობაზე განცხადება გააკეთა. მეტიც, მათ თავიანი ახალი პოლიტიკური ცხოვრების დასაწყისი ენმ-ის ლანძღვას მოუძღვნეს. დღეს, იგივე ადამიანები აცხადებენ, რომ ისინი არ ტოვებენ ენმ-ის ფრაქციას პარლამენტში. ანუ, მათ ერთიანი ნაციონალური მოძრაობის ფრაქციის თავმჯდომარე ნიკა მელია დაკავებული პოზიციიდან ხმათა უმრავლესობით მოხსნეს და გადაირქვეს სახელი, თუმცა ამის პარალელურად, შესაბამის სამსახურებს პარლამენტში ეუბნებიან, რომ ერთიანი ნაციონალური მოძრაობის რიგები არ დაუტოვებიათ. ამგვარი ორმაგი თამაშით და პროცედურული ხრიკებით, ისინი ცდილობენ ერთის მხრივ დააბნიონ საზოგადოება და მეორეს მხრივ შეინარჩუნონ დამატებითი თანამდებობები და გამონდინარე სარგებელი. ჩვენ ვპირდებით ჩვენს ამომრჩეველს და ყველა გუკშემატკივარს, რომ არ დავუშვებთ ასეთ უსამართლობას და ყველაფერს გავაკეთებთ იმისთვის, რომ ენმ-ს პარლამენტში წარმოადგენდნენ არა ადამიანები, რომლებიც ლანძღავენ ამ პარტიას, არამედ ის პრლამენტის წევრები, რომლებიც დარჩნენ ენმ-ში და დარჩნენ ერთგული იმ ღირებულებების, რომელზეც ეს მოძრაობა ყოველთვის იდგა.“

ენმ მთელს საქართველოში