ენმ-ს ხობის მაჟორიტარი დეპუტატობის კანდიდატი კარდაკარ მოსახლეობას ხვდება

 ერთიანი ნაციონალური მოძრაობის ხობის მაჟორიტარობის კანდიდატი მამუკა ჭოხონელიძე, პარტიის რაიონული ორგანიზაციის წევრებთან ერთად ყოველდღე რამდენიმე ათეულ ოჯახს სტუმრობს.შეხვედრები მოსახლეობასთან მაქსიმალურ რეჟიმში კარდაკარ მიმდინარეობს, ადგილზე მისული კანდიდატი და ორგანიზაციის წევრები ადგილზე ეცნობიან და საუბრობენ ოჯახებში და სოფელში არსებულ პრობლემებზე.ადგილობრივებს საშუალება  აქვთ გაეცნონ ერთიანი ნაციონალური მოძრაობის მაჟორიტარი დეპუტატობის კანდიდატის მამუკა ჭოხონელიძის მიმართვას  -  "ღია წერილი".

ერთიანი ნაციონალური მოძრაობა ნაციზმის და კომუნიზმის მსხვერპლთა ხსოვნის დღეს ეხმაურება

ერთიანი ნაციონალური მოძრაობა ტოტალიტარიზმის მსხვერპლთა ხსოვნის დღეს ეხმაურება, რომელიც საქართველოში 2010 წლიდან აღინიშნება. ევროპარლამენტის ამავე წლის გადაწყვეტილებით, ყოველი წლის 23 აგვისტოს ევროპაში ნაციზმისა და სტალინიზმის მსხვერპლთა ხსოვნის დღე აღინიშნება. 1939 წლის 23 აგვისტოს, ხელი მოეწერა ე.წ. მოლოტოვ-რიბენტროპის პაქტს, რითაც საბჭოთა კავშირმა და ნაცისტურმა გერმანიამ აღმოსავლეთ ევროპა „გავლენის სფეროებად” გაინაწილეს და მეორე მსოფლიო ომი მოკავშირეთა სტატუსით გააჩაღეს.კაცობრიობის ისტორიაში ორი ყველაზე დანაშაულებრივი რეჟიმის ალიანსმა საქართველოს ისტორიაზე მნიშვნელოვანი გავლენა მოახდინა. 1939 წლისთვის ჩვენი ქვეყანა უკვე 18 წლის განმავლობაში იყო ოკუპირებული და საბჭოთა საოკუპციო რეჟიმს უკვე განხორციელებული ჰქონდა ძირითადი რეპრესიები, (რის შედეგადაც ფიზიკურად განადგურდა საქართველოს პოლიტიკური, სამხედრო, სასულიერო და ინტელექტუალური ელიტები ისევე როგორც ათეულ ათასობით მოქალაქე). მიუხედავად ამისა, პაქტის ხელმოწერამ და ევროპულ პოლიტიკაში გავლენის სფეროთა ცნების მყარად დამკვიდრებამ საბჭოთა იმპერიაში ჩვენი ყოფნა კიდევ 50 წლით გაახანგრძლივა.მოლოტოვ-რიბენტროპის პაქტი განასახიერებს იმას, რასაც საქართველო ჯერაც ებრძვის და რის დაკანონებასაც რუსეთის მმართველნი კვლავაც ჯიუტად ცდილობენ. „პრივილეგირებული გავლენის სფეროს” აღიარებისა და მეზობელი სახელმწიფოს განვითარების გზის შეცვლა კრემლის საქმიანობის მთავარი ფოკუსია როგორც საერთაშორისო ასპარეზზე ასევე საქართველოს შიგნით. სამწუხაროდ, ოკუპანტი სახელმწიფო ღია და ფარული მოკავშირეების ნაკლებობას არ განიცდის.  საბჭოთა წარსულთან და მის სიმბოლოებთან მკაფიო და არაორაზროვანი დამოკიდებულება, მისი სათანადო გააზრება საერთო ევრპოპულ კონტექსტში აუცილებელი წინაპირობაა დამოუკიდებელ, ძლიერ და წარმატებულ ევროპულ საქართველოსთვის მებრძოლი არაერთი თაობის იდეათა საბოლოოდ ხორცშესასხმელად.8 ოქტომბერს ივანიშვილის რეჟიმის არჩევნებში დამარცხების შემდეგ, ნაციონალური მოძრაობის ერთ-ერთი პრიორიტეტი საბჭოთა ოკუპაციის წინააღმდეგ ბრძოლაში დაცემულთა ხსოვნის უკვდავყოფა და მათი ღვაწლის სათანადოდ შეფასება იქნება.

ენმ თედო კობახიძის წინააღმდეგ წაყენებულ ბრალდებებზე გამოძიების დაწყებას ითხოვს

ერთიანი ნაციონალური მოძრაობა თბილისის საკრებულოს წევრ თედო კობახიძის წინააღმდეგ წაყენებულ ბრალდებებზე გამოძიების დაწყებას ითხოვს. როგორც დღეს გამართულ ბრიფინგზე ენმ-ის ტყიბულისა და თერჯოლის გაერთიანებულ ოლქში მაჟორიტარი დეპუტატობის კანდიდატმა ოთარ კახიძემ განაცხადა, თედო კობახიძეს საადვოკატო საქმიანობის უფლება არ აქვს, თუმცა შემოვლითი გზით ამ საქმიანობას დის გავლენის გამოყენებით მაინც ეწევა.„მინდა გამოვეხმაურო პარლამენტის ვიცე-სპიკერ მანანა კობახიძის ძმის, თედო კობახიძის ირგვლივ არსებულ სკანდალს. იმის ნაცვლად, რომ ამ 4 წლის განმავლობაში ქართულ ოცნებას მოქალაქეების დასაქმებასა და სიღარიბის დაძლევაზე ეზრუნა, მათ ერთადერთი მიზანს ბიუჯეტის რესურსების მოხვეჭა  წარმოადგენს. დაამკვიდრეს აქამდე გაუგონარი პრაქტიკა - ახლობლების, ნათესავების და მეგობრების დასაქმება სამსახურებში და შემდგომ მათი ხელფასების წილებში ჩაჯდომა.ეს არის აბსოლუტურად გაუგონარი რამ, ამან ტენდენციური ხასიათი მიიღო და კარგია, რომ ჩვენ ამას 8 ოქტომბერს დავასრულებთ. მინდა დავამატო ისიც, რომ ცალკე შემაშფოთებელია ინფორმაცია იმის შესახებ, რომ „ქართული ოცნების“ ერთ-ერთი ლიდერის ძმა იყენებს საკუთარ ზეგავლენას იმისთვის, რომ სხვადასხვა პირებს გაუფორმდეთ საპროცესო შეთანხმება და ამაში იღებს თანხას.თუკი პროკურატურა თავად არის ჩართული ამ სქემაში, ექვემდებარება პოლიტიკურ ზეგავლენას და პოლიტიკოსებთან გარიგებაში აფორმებს საპროცესო შეთანხმებებს, ჩვენ ობიექტური გამოძიების იმედი ვერ გვექმნება. 47 დღე დარჩა იქამდე, როცა საქართველოს მოქალაქეები წერტილს დაუსვამენ ხელფასების წილებში ჩაჯდომას და ჩვენ ერთად წავიყვანთ საქართველოს წინ. თუკი შოთაძე და კობახიძე ერთად აგვარებენ ამ საქმეებს, რისი იმედი უნდა გვქონდეს არ ვიცი. მანანა კობახიძის ძმა რომ ამას აკეთებს, წარმოიდგინეთ, რას აკეთედბენ მინისტრები და ის ადამიანები, ვისაც მანანა კობახიძეზე მეტი პოლიტიკური წონა აქვს“, - განაცხადა კახიძემ. 

სუბელიანი წინასაარჩევნოდ პატიმრებზე ზეწოლის ფაქტებზე საუბრობს

ერთიანი ნაციონალური მოძრაობის დეპუტატ კობა სუბელიანის განცხადებით, სასჯელაღსრულების სამინისტროს გენერალურმა ინსპექციამ გუშინ ის გამოკითხვაზე დაიბარა. მიზეზი კი მის მიერ სოციალურ ქსელში გამოქვეყნებული სტატუსია, რომელიც ციხეებში წინასაარჩევნოდ პატიმრებზე ზეწოლის ფაქტებს შეეხებოდა."ციხეებში, წინასაარჩევნოდ პატიმრებზე და ე.წ. მაყურებლებზე ზეწოლა დაიწყო, რომ მათ თავინთი ოჯახის წევრებს დაავალონ იმუშაონ ქართული ოცნების სასარგებლოდ, შეუგროვონ ხმები.ამასთან დაკავშირებით განცხადება რამდენიმე დღის წინ გავაკეთეთ. სასჯელაღსრულების მინისტრის დავალებით დამირეკა გენერალური ინსპექციის უფროსმა, რომელმაც მთხოვა შეხვედრა, შედგა ჩვენი შეხვედრა, ვუთხარი ყველაფერი და ეს შეხვედრა გაფორმდა ოქმით, მან რა თქმა უნდა უარყო ამის შესახებ, ასევე თქვა, რომ აუცილებლად ჩაატარებს მოკვლევას და დაიწყებს გამოძიებას.მინდა მივმართო იმ ოჯახებს, პარტიმრების იმ მშობლებს, რომლებსაც ესეთი ცრუ დაპირებებით ატყუებენ, პირდებიან სასჯელის განახევრებას და არჩევნების მერე პატიმრობიდან განთავისუფლებას, ეს არის წინასაარჩევნო ტყუილი, ნუ წამოეგებით ამ ინფორმაციას და ნუ გაუწევთ დათვურ სამსახურს ხელისუფლებას, რომელმაც 2016 წლის 8 ოქტომბერს უნდა დასრულდეს."

ენმ მთელს საქართველოში